Muzeu Kombëtar i Fotografisë “Marubi” u themelua si një nevojë absolute për të identifikuar dhe promovuar arkivin fotografik të krijuar nga Dinastia Marubi dhe fotografë të tjerë të qytetit të Shkodrës, një trashëgimi kulturore unike në llojin e saj.

Në qendër të projektit të muzeut qëndron trashëgimia e Studio Fotografie Marubi, e themeluar në vitin 1856 nga Pietro Marubi, një piktor dhe fotograf italian që u vendos në Shkodër. Aktiviteti i studios u drejtua dhe u pasurua nga tre gjenerata fotografësh, deri në fillim të viteve 1950, kur Gegë Marubi u detyrua t’i nënshtrohej anonimimit kolektiv komunist, duke u bashkuar me fotografë të tjerë në njësinë e fotografisë të ish-Kooperativës së Shërbimeve Riparuese.

Në vitin 1970 u themelua formalisht Studio Fotografie Marubi si muzeu i arkivit, me rreth 500,000 negative në teknika dhe formate të ndryshme. Më vonë, imazhet historike nga arkivi u përdorën shpesh për qëllime propagandistike gjatë regjimit komunist. Gjatë kësaj periudhe, shumë prej tyre u manipuluan ose u huazuan për botime të kohës.